17. БУСДЫН БОДЛЫГ БҮҮ ТОО

"Өөрийн төрсөн хот, төрсөн гудамжиндаа нэг удаа камераа бариад тайван алхаад үзээрэй. Хэдий 60 жил амьдарсан байсан ч анх удаа тэнд ирсэн мэт санагдах болно."

- Андерс Петерсен

Анх гэрэл зураг сонирхож эхлэхдээ үзэл баримтлал, дүрэм журам, хязгаарлалт, "онол" зэрэгт түүртдэггүй байсан үеэ санаж байна уу? Хэн юу гэж хэлэх нь огт хамаагүй, өөрийгөө ч шүүмжлэх завгүйгээр гудамжинд зүгээр л тэнүүчилж юу дуртайгаа буулгаж байсан яг тэр үе. Жаахан хүүхэд л мэдэрдэг догдлол. 

Зэн буддизмд энэ хандлагыг "анхан шатны ухамсар" гэж нэрлэдэг. Бид ямар нэгэн төрлийн эрэл хайгуул, сонирхол аль эсвэл дадал зуршлыг эхлүүлж байх үедээ ямар ч дарамт мэдэрдэггүй шүү дээ. Хорвоо ертөнцийг саад тотгор бус шинэ, шинэлэг боломжоор дүүрэн хардаг.  Харин гэрэл зурагт ч бай, амьдралд ч бай илүү туршлагатай болох тусам ядарч туйлддаг нь бидэнд асуудал болдог. Бүх л юмс уйтгартай болж юуг ч сонирхмооргүй санагдана. Дэлхийн хамгийн сонирхолтой хотууд болох Парис, Токио, Нью-Йоркт амьдарч үзсэн ч хэсэг хугацааны дараа уйдаад л эхэлнэ. Энэ үедээ Андерс Петерсений зөвлөгөөг туршиж, амьдарч байгаа хотоороо нэг яваад үзээрэй. 

18. МЭДРЭМЖЭЭ БУУЛГА

Бидний сэтгэл хөдлөл байнга өөрчлөгддөг. Заримдаа бид хэт өөдрөгөөр бүхнийг хараад л амьдралын сайхныг гайхна. Харин заримдаа хамгийн новшийн амьдралаар амьдраад байгаа ч юм шиг, бүхий л зүйлс хар бараан болж хувирна. Хүмүүс намайг аялаад л, мэдлэгээ түгээгээд л, амьдралдаа гайхалтай хүмүүстэй уулзаад л их сайхан амьдарч байна гэж хардаг ч санхүүгийн, гэр бүлийн болон хувийн асуудлаас болж би амьдралдаа сэтгэл хангалуун бус байдаг. Төөрч, эргэлзэж, бухимдаж миний амьдрал хаашаа яваад байгааг ч мэдахгүй байх үе цөөнгүй бий. Заримдаа “Би яагаад зураг аваад байгаа юм бэ? Миний хийсэн зүйлс хэнд ч хамаагүй шүү дээ. Би чинь муу зурагчин, хэзээ ч алдартай болохгүй" гэж ч боддог. Яг ийм үед гэрэл зураг бол өөрийгөө эмчлэх хамгийн сайн аргуудын нэг гэдгийг ойлгосон. 

Эерэг ч бай, сөрөг ч бай сэтгэл хөдлөлөө бүү шүүмжил. Өгсөж уруудаж яг л амьдрал өөрөө галзуу хулгана байсныг бид явцдаа ойлгоно. Сэтгэл санаа муу байхад хар, цагаанаар зураг авах нь их бол эсрэгээрээ өөдрөг үед өнгөтэй зураг авах нь олонтаа. Тиймээс зүгээр л камераа гаргаж ирээд зургаа дар. Мэдрэмжээ бүтээлд мөнхлөөрэй.

Цуврал нийтлэл таалагдсан бол сэтгэгдэл үлдээгээрэй, дараагийн нийтлэлээр уулзацгаая.