Хамгийн түрүүнд миний хувьд 11mm-ийн өргөн дуран шигүү газар бүхнийг нэг кадрт багтааж байсан нь маш таалагдсан. Өргөн дуран дүрсийг сунгаж, бага зэргийн гажилт үүсгэдэг нь зургийг илүү сонирхолтой, орон зайтай болгодог. Энэ камерын хувьд хэдийгээр жижиг/cropped sensor/мэдрэгчтэй ч F1.7-2.8 хүртэл *хувьсах өрцтэй (дуран хамгийн өргөн цэг буюу 10.9mm-т тааруулсан байхад F1.7 өрцтэй ажиллаж, zoom-лэх/татах үед дурангийн татсан хэмжээнээс хамааран өөрчлөгдөж F2.8 дээр тогтворждог),  гэрэл мэдрэх чадвар сайтай учраас бүхий л төрлийн орчин, нөхцөлд төвөггүйхэн зураг гаргах чадвартай. Шөнийн, хурдтай зураг авахад асуудалгүй гэдэг нь мэдрэгдэж байсан. 

F1.7 өрцтэй учир шөнийн зураг авахад ISO-г өндөр тохируулахгүйгээр хурдтай зураг авах боломжтой.

Шөнийн гэрэл багатай нөхцөлд зураг авахад хөдөлгөөн бага мэдэрдэг (image stabilization/дүрс тогтворжуулагч нь тун боломжийн), өндөр ISO тохируулахад асуудалгүй, деталь сайтай гарсан. 

Хэсэг хугацаанд ашигласны дараа бүрэн эзэмшээд буюу “гартаа оруулчихсан” байхад хүчин чадлынх нь хязгаарыг мэдчихвэл бүхий л төрлийн зургийг гарган авах боломжтой санагдсан. Тэр тусмаа аяллын, баримтат, гудамжны, сурвалжилга зураг авалтад тохиромжтой загвар, хийц, ажиллагаатай.

Авсаархан, хөнгөн болохоор байнга авч явахад төвөггүй. Тиймээс камераа өөрт байнга ойр авч явах, тааралдсан сонирхолтой зохиомж, онцгой агшныг цаг алдалгүй камерын дуранд буулгах/авах хүсэлтэй ч мэргэжлийн Fullframe камер чирч явах сонирхолгүй над шиг хүнд тохиромжтой. Мөн хийц нь загварлаг, ганган камер болохоор гудамжинд хүмүүс хөрөг зургаа авхуулахдаа таатай хүлээн авч байв. (Гоё юманд хүмүүс нугасгүй.)  Leica D-Lux 7 загварыг брэндүүдтэй хамтран edition/загварууд гаргаж байгаа нь тус камерыг дан ганц гэрэл зураг авах аппарат бус, цуглуулгын зүйл/collectable болгож байна. Одоогийн байдлаар Vans, James bond 007, Bape гэсэн хамтарсан edition/загварууд гарчээ.