Энэ удаагийн биенналь анх удаа манай оронд зохион байгуулагдаж байна, энэ талаар та сэтгэгдлээ бидэнтэй хуваалцана уу.  
Надад үнэхээр гайхалтай санагдаж байна. Улс болгоны шилдэг артистууд эх оронд маань хүрэлцэн ирж бүтээлээ дэлгээд, бид үзэх боломжтой боллоо шүү дээ. Мөн  ийм сайхан үйл явдлын нэгэн хэсэг байгаадаа маш их талархаж байна. Үүнийг зохион байгуулсан бүх хүмүүсээр бахархаж байгаагаа илэрхийлье. 

Миний хувьд бүх цаг үеийнхээ хамгийн том хэмжээтэй бүтээлийг урлаж, энд үзэгчдэдээ хүргэж байна. Үнэндээ "Монголын Уран Зургийн Галерей"-д бүтээлээ дэлгэх нь миний нууцхан хүсэл байсан. Яг одоо нэг мөрөөдөл биелсэн байна. 

Үзэсгэлэнд дэлгэсэн бүтээлийнхээ тухай танилцуулж өгнө үү. 
Миний бүтээлийн нэр нь "Empyrean Aeon" буюу монголоор "Огторгуйн дуудлага" хэмээх орчуулгад санал нэгдсэн. Ийн орчуулахдаа би найзаасаа тусламж аваад, хамтран судалж ярилцаад шийдэлд хүрсэн. Ерөнхийдөө цаг хугацаа, орон зайд үл захирагдах хүчирхэг, ариун, өнө оршихуйг бэлгэдсэн. Тэрхүү ер бусын оршихуй хүн төрөлхтнийг ивээж, тэтгэж, үргэлж хамт холбоотой байдгийг илэрхийлэх гэж хичээсэн. 

Empyrean: the highest heaven, supposed by the ancients to contain the pure element of fire--
Aeon: an immeasurably or indefinitely long period of time

Бүтээлийнхээ хийц, агуулгыг та тайлбарлаж болох уу? 
Урт удаан үргэлжлэх дулаан тэврэлт мэт тайван бөгөөд хязгаар үгүй тэнгэрийн хаяа бидний газар дэлхийтэйгээ хүйн холбоотой гэдгийг чимээгүйхэн шивнэн сануулах шиг.  “Огторгуйн дуудлага” бүтээл нь тэнгэртэй холбогдох босоо холбоосыг бэлгэдэж, амьд бүхэн доор нь нэгэн зэрэг амьсгалан орших Мөнх хөх тэнгэрийн ивээлийг илтгэх төдийгүй орчны онцлогт суурилсан инсталляц бүтээл юм. Хонин холбоо, адууны дэл ашигласан нь ч утга учиртай. 

Хүн төрөлхтөн уул, ус, байгаль, тэнгэртэйгээ үргэлж холбоотой. Нэгэн бүхэл зүйлийн нэг хэсэг. Тиймээс байгалийн оршихуйг хүндлэн хайрлахыг сануулах зорилготой. Голд байрлах хээг би газар, тэнгэр, огторгуйн чиглүүлэгч, луужин хэмээн сэтгэж бүтээсэн. 
Гэхдээ бүтээлээ яг таг ийм гэж тайлбарлахаас урьтаж үзэгчид өөрсдийнхөө оюун, зүрх сэтгэлдээ тунгаан хүртээсэй гэж бодож байна. 

Хэдий хэр хугацаанд гүйцэтгэсэн бэ? 
Боловсруулж, гардан гүйцэтгэсэн хугацаанаас илүүтэй зүрх сэтгэлдээ маш удаан тээж явсан. Яг амилуулж гаргахад ерөнхийдөө сар гаруй хугацааг зарцуулсан. 

Таны дараагийн төлөвлөгөө юу вэ?
Узбекстан улсын Бухара хотын биенналь-д оролцох урилга хүлээн авсан. Мөн ирэх 10-р сард "Asian Now Paris" үзэсгэлэнд оролцохоор төлөвлөсөн. Эдгээр ажлуудад зориулан өөрийгөө бэлтгэх, бүтээлийн санаагаа олох эрлийг эхлүүлээд байна. 

Уран бүтээлээ туурвих эрч хүч, урам зоригийг хэрхэн олж авдаг вэ?
Байгальд л ойр байхыг эрмэлздэг. Хэдийгээр Герман улсад төрж өссөн ч монгол ахуй, түүх, өв соёл маань надад ойр байдаг шүү. Морьт харваагаар хичээллээд удаагүй байгаа ч миний хувьд морь унаж, үндэсний спортоор суралцах нь үнэхээр сайхан байдаг. Одоо боломж л олдвол хөдөө байх дуртай. 

Ер нь та уран бүтээлийн санаагаа хэрхэн олдог вэ? 
Миний бодлоор бүтээл өөрөө ирдэг. Түүнийг уран бүтээлч гүйцэлдүүлдэг гэдэгт итгэдэг. "Огторгуйн дуудлага" бүтээл ч гэсэн өөрөө биеллээ олсон мэт санагддаг. Хүчтэй энергитэй, утга учиртай бүтээл бол өөрийнхөө "замыг засдаг".

Оюутан байхдаа өөрийгөө маш их дайчилж, аль болох олон бүтээл л хийхийг хичээдэг байсан. Харин одоо бол бүтээлийн араас хөөцөлдөх биш, түүнийг хүлээн авах зөн совин, бие сэтгэлээ бэлдэж, бэлэн байхыг зорьдог болсон. 

Үзэсгэлэнд тавигдсан бүтээлээ дараа нь хэрхэн хадгалдаг вэ?
Миний бүтээлүүд ирээдүйд хэн нэгний тав тухыг алдагдуулах эсхүл хог болох вий гэдгээс эмээдэг. Тиймээс дахин ашиглаж болохуйц, байгальд ээлтэй материалаар бүтээлээ урлахыг хичээдэг. Заримдаа өмнөх бүтээлдээ ашигласан материалыг сэргээн засварлаж шинэ бүтээл хийх ч тохиолдол бий. 

Цаг гарган ярилцсанд баярлалаа, төлөвлөж зорьж байгаа бүхэнд тань амжилт хүсье.

Web: https://nominzezegmaa.com/