Софиа галерейд "Mongolian tie demokratiaan" үзэсгэлэн нээлтээ хийлээ
Финландын сэтгүүлч Ирья Халашийн гэрэл зургийн үзэсгэлэн 2025 оны 5-р сарын 31-нд Хельсинки хот дахь Софиа соёлын төвийн галерейд нээлтээ хийлээ.
Үзэсгэлэнд Ирья Халашийн 1990 оны Ардчилсан хувьсгалын үеэр дарсан түүхэн гэрэл зургууд, тухайн цаг үеийн уур амьсгалыг илэрхийлэх МоАХ, Зориг сан, шог зураач С.Цогтбаяр, Польшийн Эв санааны нэгдэл бүлгэмийн сан хөмрөг ба Ирьягийн хувийн цуглуулга дахь зурагт хуудаснууд багтсан бөгөөд нийт 150 гаруй бүтээлийг олон нийтэд толилуулж буйгаараа онцлогтой.
Арга хэмжээний нээлтийг Монгол Улсаас Финланд Улсад хавсран суугаа Онц бөгөөд Бүрэн эрхт Элчин сайд Ц.Мөнх-Өлзий нээж, Софиа сангийн удирдах зөвлөлийн дэд дарга Тимо Киетевайнен нээлтийг хөтлөв. Мөн Финландын парламентын Монголын найрамдлын бүлгийн гишүүн, парламентын гишүүн Киммо Килюнэн, Монгол Улсад Элчин сайдаар сууж байсан Маря-Лийса Килюнэн Ирья Халашид баярын мэндчилгээ нээлтийн үеэр дэвшүүлэв.
Зохион байгуулагчаар Финландын Lions Club Vantaankoski-Vandaforsen клуб ажилласан бөгөөд Монголын талаас “Голомт сан”, Финландын талаас Софиа соёлын төв, Nyblin, eCredo зэрэг байгууллага дэмжин ажилласан юм.
Ирья Халаш
Финландын сэтгүүлч, гэрэл зурагчин, продюсер Ирья Халаш 1987 оноос хойш Монгол Улсад амьдарч, ажиллаж байна. Тэрээр Унгар улсын ЭЛТЭ Будапештын Их сургуульд Монгол судлал, хэл бичгийн чиглэлээр суралцаж, улмаар Финландын Засгийн газрын тэтгэлгээр Монгол Улсын Их Сургуульд үргэлжлүүлэн суралцахаар тухайн үеийн БНМАУ-д ирсэн юм.
Ирья 1989–1990 оны Ардчилсан хувьсгалын түүхэн үйл явдлыг газар дээрээс нь сурвалжилж, Монголын ардчиллын үйл явцыг олон улсын хэвлэл мэдээллийн хэрэгслийн анхаарлын төвд хүргэсэн анхны гадаад сэтгүүлчдийн нэг байв. 1990–2006 онд тэрээр Reuters агентлагийн Монгол дахь сурвалжлагчаар ажиллаж, Монголын улс төр, нийгэм, соёлын талаар олон улсын уншигчдад мэдээлж ирсэн.
Ирья Халаш нь гэрэл зургийн үзэсгэлэн, баримтат кино, номын хэд хэдэн төслийг амжилттай хэрэгжүүлсэн. Тухайлбал, 2020 онд “Сэрсэн Монгол – Revolution” гэрэл зургийн цомгоо гаргаж, гэрэл зургийн үзэсгэлэн зохион байгуулсан. 2022 онд судлаач Б.Мэнд-Амартай хамтран “Шилжилтийн үеийн Монголын зурагт хуудас” номыг эмхэтгэж, 2023 онд ижил нэртэй үзэсгэлэнг Монголын Театрын музейд нээсэн юм.2025 онд Финландын нийслэл Хельсинки хотод өөрийн Монголын ардчилсан хувьсгал, шилжилтийн цаг үеийг баримтжуулсан "Mongolian tie demokratiaan" гэрэл зургийн үзэсгэлэнг анх удаа эх орон нэгтнүүддээ танилцуулж буй юм.Тус үзэсгэлэн 2025 оны 8-р сарын 31-ний өдрийг хүртэл үргэлжилнэ.
Гэрэл зургийг: Б.Мэнд-Амар
Сэтгэгдэл
Та сэтгэгдэл бичихдээ хууль зүйн болон ёс суртахууны хэм хэмжээг баримтлах. Ёс бус сэтгэгдлийг админ устгах эрхтэй. Мэдээний сэтгэгдэлд pixels.mn хариуцлага хүлээхгүй.