1862 онд энд Хонгконгийн анхны барууны хэв маягийн төрийн өмчийн сургууль нээгдсэнээр уг газрын түүх эхэлдэг. Харин Дэлхийн II дайны үеийн хүчтэй бөмбөгдөлт, эвдрэл сүйтгэлээс үүдэн сургуулийг бүрэн буулгаж, 1951 онд Хонгконгийн анхны албан ёсны орон сууц болох Married Police Quarters (MPQ) баригдсан нь дараагийн түүхэн үеийг үргэлжлүүлсэн юм. 2009 онд хэрэгжсэн “Conserving Central” санаачлагын хүрээнд дотоод орон зайг шинэчилж, MPQ нь PMQ нэртэй бүтээлч төв болон дахин “мэндэлсэн”.

Барилга нь Hollywood ба Staunton гэсэн 7 давхар хоёр блок, 4 дэх давхараар хоорондоо гүүрээр холбогддог, 2 барилгын голд цэлгэр талбайтай. 70 гаруй жилийн өмнө баригдсан тул сүүлийн үеийн барилгуудтай харьцуулахад цөөн давхартай, намхан, цэлгэр орон зайтай, олон том цонхтой, шатны хонгил, коридорын тасалгаанд байх дугуй цонх нь тэр үеийн барилгын модернист стилийн элемэнтийг илтгэнэ. Цахилгааны утас, усны шугамнууд нь ил байгаа нь барилгын технологиосоо болсон байх, засвар үйлчилгээ хийхэд амар болохоор тэгж хийсэн ч байж магадгүй. Олон хүн нэг дор амьдрахад зориулсан тал бүрээсээ олон орц, гарц, шаттай байсан.     

Биднийг очиход HKWALLS FESTIVAL 2025 зохион байгуулагдаж, grafitty уран бүтээлчид тэр хавиар зургаа зурж, олон уран бүтээлчдийн үзэсгэлэн гарж байсан.

Өнөөдөр PMQ нь 1950-иад оны функциональ модернизмын цэвэр геометр, дугуй цонх, намхан хэр нь цэлгэр масштабыг хадгалсан хэвээр. Эдгээрийг орчин үеийн уян хатан интерьерийн шийдлээр баяжуулснаар студи, галерей, поп-ап дэлгүүр, воркшопуудын амьд орчин бүрдэж, PMQ нь түүх ба орчин үеийг холбосон хотын соёлын амьд организм болон оршиж байна.